ლემშვენიერა სათიბი მიწების პრობლემის მოგვარებას და ადგილობრივი ხელისუფლების შეცვლას ითხოვს

KKPRESS.GE

დღეს, გარდაბნის რაიონის სოფელ ლემშვენიერას მოსახლეობამ აქცია გამართა. რაიონის მაჟორიტარის ბიუროსთან შეკრებილი ხალხი სოფლის სათიბი მიწების პრობლემის მოგვარებას და ადგილობრივი ხელისუფლების შეცვლას ითხოვდა.

ამ მოთხოვნით ლემშვენიერადან  ჩამოსულებს  გარდაბნის ადგილობრივი მოსახლეობის აზერბაიჯანული ნაწილიც შეუერთდა. აქციაზე დაალხოებით 150 კაცი შეიკრიბა.

,, რაიონის გამგებელი 1995 წელს ლევან ჯაფარიძე იყო. მან დადგენილება მიიღო და სოფლის 1 300 ჰექტარი საძოვრები მოსახლეობას გადასცა. მიუხედავად ამისა,  2008 წელს ეკონომიკის მინისტრმა, ეკა შარაშენიძემ აღნიშული მიწები ეკონომიკის სამინისტროს ბალანსზე გადაიყვანა. შემდეგ კი გამოჩდნენ ბურები, რომლებსაც გადასცეს  ეს მიწა და ჩვენ ადგილობრივი მოსახლეობა სათიბების გარეშე დავრჩით.

ვითხოვთ დაინტერესდეს აღნიშნული საკითხით პროკურატურა.  ასევე,  გვინდა შეიცვალოს გარდაბნის გამგებელი და ადგილობრივი ხელისუფლება, რომელმაც ამ  პრობლემის წინაშე დაგვაყენა",  - საუბრობდა, ლემშვენიერადან ჩამოსული ადგილობრივი, ჯოყოლა ხორგუანი.

აქციის მთავარ  ძალას კი მაინც კოალიცია ,,ქართული ოცნების" წევრები წარმოადგენდნენ. მიუხედავად იმისა, რომ აცხადებდნენ, რომ შეხვედრა მიზნად ისახავს მიწების საკითხის მოგვარებას, საუბარი ხშირად მიწების თემიდან  გამგებლის საკითხზე  გადადიოდა.

kkpress.ge-სთან საუბარში ,,ქართული ოცნების" გარდაბნის ორგანიზაციის ხელმძღვანელი, ამბაკო ავალიანი აღნიშნავდა, რომ მიწების პრობლემა ბუნებრივად დაუკავშირდა ადგილობრივი  ხელისუფლების ცვლილების მოთხოვნას. მისი თქმით, მოსახლეობას არ სურს რაიონი მართოს იმ გუნდა, რომელსაც 9 წლის მანძილზე მათ ერთი მნიშვნელოვანი პრობლემაც ვერ  მოუგვარა.

 ,, აქ არის მეორე მომენტიც, რამდენიმე დღის წინ ბურებმა კიდევ ერთხელ შეცვალეს საზღვარები და ახლა სხვა სათიბები მონიშნეს. დამატებით კიდევ იღებენ მიწას. მოსახლეობა ამაზე, უკვე, ვეღარ  გაჩუმდება.  ჩვემ ერთადერთი ბიძინა ივანიშვილის იმედი გვაქვს, ვიცით დაინტერესდება ჩვენი პრობლემით და გადაწყდება ეს საკითხი", - აცხადებდა, ავალიანი.

,,ოცნების" გარდაბნელი წევრის ტელმან გასანოვის თქმით,  კი რაიონში  წლებია მიწის საკითხი კორუფციას უკავშირდება. აცხადებს, რომ სახელმწიფო ბიუჯეტში გადასახადის დამალვის მიზნით პირველი ხარისხის მიწა ოფიციალურად  მე-3 ხარისხად არის გაფორმებული.  

,, საქმე იმაშია, რომ როდესაც მიწის რეფორმა დაიწყო და წესით ყველას უნდა მიეღო მიწა, მოსახლეობის 50%-ზე მეტი  მიწი გარეშე დარჩა. მათ ნაცვლად  მიწის დიდი ფართობები  ერთეულებმა ჩაიგდეს ხელში. მოსახლეობა სიტუაციის შეცვლას, უკვე ახალი ხელისუფლებისგან ითხოვს. უკმაყოფილებას იწვევს ის გარემოებაც, რომ 5  თვე გავიდა და რაიონს ახალი  გამგებელი არ ჰყავს. დეპუტატი და საკრებულო აცხადებენ, რომ მხარს მხოლოდ ,,ზევიდან" მოწონებულ კადრს დაუჭერენ" , - საუბრობდა, ტელმან გასანოვი.

ლემშვენიერას მოსახლეობა აგრძელებს საპროტესტო აქციებს. ხვალ  10:00 საათზე მორიგი აქცია  გარდაბნის გამგეობასთან გაიმართება.

პ.ს აქციის ფოტორეპორტაჟი იხილეთ kkpress.ge-ს facebook-ის ოფიციალურ გვერდზე 

 

kkpress.ge მასალის გამოყენება შეგიძლიათ, მხოლოდ, საიტის მითითებით