,,ნოვრუზ ბაირამი“ მარნეულში

KKPRESS.GE

დღეს, მარნეულში აზერბაიჯანული საზოგადოებისთვის ,,ნოვრუზ ბაირამის" მისალოცად პრემიერ-მინისტრი და მთავრობის წევრები ჩავიდნენ. ცხრა წლის მანძილზე პირველად მარნეულში ბაირამობაზე პრეზიდენტი არ ჩანდა.

სააკაშვილს მარნეულში, რომ აღარ  ელოდნენ ეს ადგილობრივი მოსახლეობის გამგეობის წინ გამართულ მცირე სუფრებზეც ჩანდა. ჯეჯილის, ქადის და ტკბილეულის გვერდით მათ აზერბაიჯანულ დროშებთან ერთად კოალიცია ,,ქართული ოცნების" 41-ნომრიანი დროშები ედოთ. ,,ოცნების" პატარა ზომის დროშებით დადიოდნენ ახალგაზრდებიც.

,,ნოვრუზ ბაირამი"  პრემიერ-მინისტრმა მოსახლეობას ქართულ-აზერბაიჯანულად მიულოცა. მილოცვას რაიონის გამგებელი, რეინტეგრაციის მინისტრი და თბილისიდან ჩამოსული სხვა მთავრობის წევრებიც შეუერთდნენ. ივანიშვილმა ინტერვიუ, მხოლოდ, აზერბაიჯანულ ტელეარხებს მისცა. რეინტეგრაციის მინისტრმა კი ადგილობრივ ჟურნალისტებს განუცხადა, რომ ქვეყანა მალე დაინახავს იმ ახალი პოლიტიკის შედეგებს, რასაც მათი  მთავრობა ატარებს.

საზეიმო ღონისძიებები ორ საათს გაგძელდა. სხვადასხვა ანსამბლებთან ერთად სცენაზე მომღერლებიც გამოდიოდნენ. მომღერალმა ეთერ კაკულიამ მარნეულელებს ბაირამობა ,,თბილისოთი"  მიულოცა. ადგილობრივი მოსახლეობა ჩაის სმით და ქეიფით ირთობდა თავს. სცენიდან რამდენიმე მეტრში კი ჭიდაობაში შეჯიბრი გაიმართა.

ნოვრუზ ბაირამის  აღნიშნვა გრძელდება. ხვალ, მარნეულში ადგილობრივი მოსახლეობა, კვლავ, შეიკრიბება. ბაირამს  საზეიმო კონცერტით 12 საათზე აღნიშნავენ გარდაბნის კულტურის სახლშიც. 

ნოვრუზ ბაირამი ყოველწელს აღინიშნება ქვემო ქართლის რაიონებში. იმართება საზეიმო ღონისძიებები. ნოვრუზი - სპარსული სიტყვაა. მისი ერთი ნაწილი "ნოვ"- ახალს, ხოლო მეორე - "რუზ" დღეს ნიშნავს. ოდითგანვე 21 მარტს დღისა და ღამის გათანაბრების, ჰაერის გათბობის, თოვლის დნობის დაწყების, ხეებზე ყლორტის გამოსვლისა და დედამიწის გამოცოცხლების, ანუ სიციცხლის დაწყების დღედ მიიჩნევენ და შესაბამისად, ნოვრუზ ბაირამიც გაზაფხულის შემოსვლის, ზოგიერთ ქვეყანაში კი ახალი წლის დღესასწაულია.

პ.ს ფოტორეპორტაჟი იხილეთ kkpress.ge-ს facebook-ის ოფიციალურ გვერდზე

მსგავს თემაზე:   ,, გარდაბანში ნოვრუზ ბაირამი  აღნიშნეს" http://www.kkpress.ge/index.php?do=fullmod/news&id=122

kkpress.ge მასალის გამოყენება შეგიძლიათ, მხოლოდ, საიტის მითითებით