19 აპრილი და რუსთაველი ,,ნაციონალები“

KKPRESS.GE

,, სასაცილოა იმის თქმა, რომ ჩვენ მხარდამჭერები აქციებზე ძალით მიგვყავს,  ან მიგვყავდა"

,, ნაციონალური მოძრაობის" მიერ დაანონსებულ აქციამდე  ოთხი  დღე რჩება. ყოფილი მმართველი გუნდი, ხალხმრავალი აქციის მოსაწყობად  საინფორმაციო კამპანიას დედაქალაქსა და   რეგიონებში აწარმოებს.   მოქალაქეებს ევროპული არჩევანისა და პროდასავლური ორიენტაციის დასაცავად  აქციაზე გასვლისკენ მოუწოდებენ.

ქვემო ქართლის საინფორმაციო პორტალი დაინტერესდა,  როგორ ემზადებიან 19 აპრილის აქციისთვის რუსთაველი  ,,ნაციონალები". კითხვაზე რუსთავის საკრებულოს ფრაქცია  ,,ერთიანი ნაციონალური მოძრაობის" თავმჯდომარე,  ალექსანდრე კვაჩიძე გვპასუხობს, რომ განსაკუთრებული სამზადისი არ მიდის, თუმცა იმედი აქვს, რომ აქციას  ბევრი რუსთაველი შეუერთდება.

წარსულში ერთგვარ ტრადიციას წარმოადგენდა რა, ყოფილი მმართველი გუნდის მხარდასაჭერად  სამარშუტო ტაქსებით  ,,გადაყვითლება " რუსთავის და სამსახურის დაკარგვის შიშით საჯარო მოხელეთა ნაწილის იძულებით აქციებზე მიყვანა - რესპოდენტს ,,ძველ მეთოდებს" ვახსენებთ..  კვაჩიძე მხარდამჭერების ამ მეთოდით მობილიზებას  კატეგორიულად უარყოფს და აცხადებს, რომ ასეთი რამ არ მომხდარა  და არც  19 აპრილის  აქციაზე აპირებენ, ვინმეს ძალით წაყვანას. 

,,  ვინც მხარს უჭერს ქვეყნის ევროპულ კურსს და გზას ნატოსკენ, აუცილებლად უნდა შეუერთდეს 19 აპრილის აქციას. კონკრეტულად ციფრებს ვერ დაგისახელებთ, მაგრამ ვიცი, რომ ჩვენი ქალაქიდან ძალიან ბევრი ადამიანი აპირებს წამოსვლას რუსთაველის გამზირზე.

ჩვენი მხრიდან,  არც 1 ოქტომბრამდე და არც ეხლა არ მოხდება  აქციაზე ვინმეს ძალდატანებით წაყვანა.  წარსულშიც ყველა თავისი სურვილით  ესწრებოდა ხოლმე აქციებს.

19 აპრილსაც,  სწორედ ასე მოხდება.  ვისაც სურვილი გაუჩნდება, ის წავა კიდეც.  ჩვენი მხრიდან არავითარი იძულება არ იქნება არც საბავშო ბაღების, არც სკოლის და არც თვითმმართველობის თანამშრომლებზე.  აქციაზე   მივა  ის ხალხი, ვინც  ნაციონალურ მოძაობას და  ქვეყნის ევროპულ მომავალს უჭერს მხარს. 

და სასაცილოა იმის თქმა, რომ ჩვენ მხარდამჭერები აქციებზე ძალით მიგვყავს,  ან მიგვყავდა. ასევე, მინდა ხაზგასმით აღვნიშნო, რომ აქციაზე წასვლის ყველა მსურველი თავისი ფინანსებით წავა და ჩვენ მათთვის ტრანსპორტის მობილიზებასაც არ ვახდენთ",  - აცხადებს, რუსთავის საკრებულოს ფრაქცია  ,,ერთიანი ნაციონალური მოძრაობის" თავმჯდომარე.

სოფიკო ზურაშვილი

მსგავს თემაზე: თუ ხალხს  ვერ აგროვებდნენ რაღაზე მოვყავდით", - ჩიოდნენ ,,უგულავას" ყვითელისამარშუტო ტაქსების მძღოლები http://kkpress.ge/index.php?do=fullmod/news&id=420&mid=13

kkpress.ge მასალის გამოყენება შეგიძლიათ, მხოლოდ, საიტის მითითებით