თვითმმართველობის თანამშრომელთა ნაწილი აცხადებს, რომ 19 აპრილის აქციაზე მისვლას სთხოვენ

KKPRESS.GE

დღეს,  დემოკრატიული ჩართულობი ცენტრში ადგილობრივი თვითმმართველობის თანამშრომლების ნაწილმა მედიასთან შეხვედრა გამართა. მათ  ნაციონალური მოძრაობის მიერ  19 აპრილის დაგეგმილ აქციასთან დაკავშირებით საკუთარი პოზიცია დააფიქსირეს და გარკვეულ ,,თხოვნებზე" ისაუბრეს.  

„ არა ძალადობას,  ჩვენ ვემიჯნებით  19 აპრილის მიტინს, რომელზე დასწრებასაც გვავალდებულებს და გვთხოვს ადგილობრივი ხელმძღვანელობა", - განაცხადა რუსთავის მერიის ურბანული დაგეგმარებისა და ტრანსპორტის განვითარების სამსახურის უფროსმა,  ხათუნა მიშველაძემ. 

მისი განცახდებით, თვითმმართველობაში მომუშავე სხვა თანამშრომლებიც უერთდებიან ამ  პროტესტს, თუმცა მათ ჯერ  არ ჰყოფნით გამბედაობა ამაზე ისაუბრონ.

„ ანალოგიური ვითარებაა  თვითმმართველობის ყველა სამსახურში, მაგრამ შეიძლება ეხლა ვიღაცას არ ეყო იმის გამბედაობა აღნიშნული განცხადება გააკეთოს..  ჩვენ არ გვინდა ზეწოლა მოხდეს თვითმმართველობაში მომუშავე პირებზე.  კონკრეტულად ვისგან მოდის თხოვნა 19 აპრილს მივიდეთ აქციაზე -  სახელი და გვარის დასახელება არ მინდა, თუმცა ვიცი, რომ ჩვენ,  მერის და აპარატის  უფროსის თხოვნის საფუძველზე მოგვმართეს..", - ამბობს მიშველაძე.

პროტესტს „არა ძალადობას" მასწავლებლებიც შეურთდნენ და მათი საერთო პოზიცია  მე-20 სკოლის პედაგოგმა ნელი ღოლიჯაშვილმა დააფიქსირა. მისი თქმით,  19 აპრილის მიტინგი იმ დემაგოგიის გაგრძელებაა,  რომელიც ქვეყანაში 9 წლის განმავლობაში მიმდინარეობდა.  

„ როგორც ადრე ხდებოდა იძულების წესით აქციაზე ადამიანის წაყვანა, ახლა ასე ნამდვილად აღარ ხდება,  თუმცა  მე მაქვს ინფორმაცია, რომ თხოვნის ფორმით აქციაზე წასვლის მოწოდება მაინც ხდება", - აცხადებდა, რუსთავის მე-20 სკოლის პედაგოგი ნელი ღოლიჯაშვილი.

თემაზე კომენტარს რუსთავის  საკრებულოს აპარატის უფროსი, მაია დოლიძე და ქალაქის მერი, ლაშა მინდელი აკეთებენ. მათი განცხადებით,  თანამშრომლები რომელთაც პროტესტი გამოთქვეს ,,ქართული ოცნების" მიერ არიან მართულნი.

 „ მინდა სრული პასუხისმგებლობით განვაცხადი, რომ ის ბრალდებები რომელიც ჩემს მიმართ იყო წარმოთქმული არის სიცრუე. ეს არის ოცნების წევრებისგან მიზანმიმართული  პროვოკაცია.  ჩვენ მივმართავთ ზომებს და ზომები იქნება რადიკალური და ეს თქვენთვის სიურპრიზი იქნება", -განაცხადა,  მაია დოლიძემ.

მსგავს პოზიციაზე იყო ქალაქი მერიც.  „მე ჩავატარებ შიდა მოკვლევას და  თუ ასეთი  ფაქტი დაფიქსირდა,  თუ თანამდებობის პირებმა მსგავსი რამ  გააკეთეს დაისჯებიან,  თუ არადა აუცილებლად დაისჯებიან ის ადამიანები,  რომლებიც ცილისწამებას ეწევიან. მე ვფიქრობ, რომ ეს ცილისწამებაა.  მინდა ხაზგასმით ვთქვა,  რომ სანამ   ქალაქის მერი ვარ და კიდევ დიდხანს ვაპირებ ყოფნას, უკანონობა არ იქნება არავისთან და არაფერთან მიმართებაში", - საუბრობდა, რუსთავის  მერი, ლაშა მინდელი.

მედიასთან შეხვედრამდე ქალაქის ხელმძღვანელმა პირებმა თვითმმართველობის თანამშრომლებთან მცირეხნიანი თათბირი გამართეს. აღნიშნულ თემაზე კომენტარი გააკეთა,  ასევე საკრებულოს აპარატის საორგანიზაციო განყოფილების უფროსმა,  ია გიუნაშვილმა.

,, არავითარი ზეწოლა  არ ყოფილა  და არც მოწოდება მიტინგზე წასვლის. ყოველშემთხვევაში ჩვენს სამსახურში, ნამდვილად ასეთი რამ არ ყოფილა", -აცხადებდა, საკრებულოს საორგანიზაციო განყოფილების უფროსი,  ია გიუნაშვილი.

ეკატერინე კუდარავა

kkpress.ge მასალის  გამოყენება  შეგიძლიათ,  მხოლოდ,  საიტის  მითითებით