19 აპრილის აქცია და მისი მხარდამჭერები

KKPRESS.GE

,,ნაციონალური მოძრაობის" დაანონსებული აქცია შედგა. რუსთაველის გამზირმა 9 წლის შემდეგ, პირველად ყოფილ მმართველ გუნდს უმასპინძლა.

საქართველოს, ნატოს და ევროკაშირის დროშებით დაფარული აქციიდან ნაცნობი სახეები ჩანდნენ. აქციას პრეზიდენტთან, ვანო მერაბიშვილთან, საპარლამენტო უმცირესობის წევრებთან ერთად - რაიონების თვითმმართველობების  და გუბერნიების თანამშრომლებიც ესწრებოდნენ. მათ შორის იყვნენ ქვემო ქართლის საჯარო მოხელეები.

" ბოლო შვიდი თვე თქვენ გაპატიმრებდნენ, დაკითხვებზე დაგათრევდნენ, ხელებს გიგხრიხავდნენ , სამსახურიდან გიშვებდნენ, მაგრამ მაინც მოხვედით," - მიმართავდა პრეზიდენტი შეკრებილებს. დავით ბაქრაძე კი აცხადებდა, რომ სულ ტყუილად ჰგონია ახალ ხელისუფლებას, თითქოსდა ,,ნაციონალური მოძარობა" მოკვდა.

,, ხმები ჩვენი გარდაცვალების შესახებ გადაჭარბებულია", - ამბობდა, ბაქრაძე. მის პატოსს იზიარებდა ვანო მერაბიშვილიც ,, დღევანდელი დღე, 19 აპრილი უკვე შევიდა საქართველოს ისტორიაში. აქ მობრძანებით ისტორიას ჩააბარეთ საფრთხე, რომლის წინაშეც საქართველო იდგა. ამ დღის მერე ვერავინ, ვერც ივანიშვილი, ვერც მისი მინისტრები და ვერც პუტინი ვერ გაბედავს იოცნებოს, რომ საქართველო ოდესმე დაშორდება ევროპას", - აცხადებდა მერაბიშვილი.

აღნიშნულ აქციას,  ქვემო ქართლის გუბერნატორის ადმინისტრაციის თანამშრომლების გარდა, რუსთავის თვითმმართველობაში დასაქმებულები, ააიპ ,,რუსთავის  კორპუსის" თანამშრომელთა და მამასახლისთა ნაწილიც ესწრებოდა.

ის, რომ აქციაზე გუბერნატორის ადმინისტრაციიდან გეგმავდნენ ჩასვლას -   აქციის დაწყებიდან 2 საათით ადრე,  თავად გუბერნატორისგან შევიტყვეთ. ,, პირადად მე ვუერთდები ამ აქციას  და ცხადია,  მისაღებია ის მიზანი რისთვისაც ის იმართება. რაც შეეხება ჩემ თანამშრომლებს ვისაც აქვს,  აქციაზე მისვლის სურვილი შეუძლია გამოიყენოს ის, რომ დღეს მოკლე სამუშაო დღე გვაქვს და სამი საათის შემდეგ  წავიდეს აქციაზე.

მოკლე სამუშაო დღე გვაქვს, რადგან გავითვალისწინეთ თანამშრომელთა ინტერესი აქციის მიმართ. ვისაც სურვილი აქვს  წასვლის, ამის საშუალებას ვაძლეთ.  ცხადია, არიან ისეთი თანამშრომლები, ვისაც ამის სურვილი არ აქვთ და შესაბამისად, არ დაესწრებიან აქციას", - საუბრობდა, დავით კირკიტაძე. მის  მსგავსად, აქციაზე დასასწრებად  დედაქალაქში მარნეულის ყოფილი გამგებელი, ზაზა დეკანოიძეც ჩავიდა. მას ქართული მედია პროკურატურის არა ერთგზის დაკითხვებიდანაც  იცნობს.

,, ამჟამად ვარ გუბერნატორის მოადგილე. აქციას დავესწრები, რადგან მას ის მიზანი აქვს რაც ჩვენ პარტის ჰქონდა მუდამ. საუბარი, მაქვს ევროპულ გზაზე და არჩევანზე. რაც შეეხება კითხვას დაკითხვებთან დაკავშირებით, სულ 6-ჯერ დამკითხეს. მითხრეს, რომ მე-4 უფასო იქნება-ო,  მაგრამ ასე არ იყო", - ხუმრობს, დეკანოიძე.

აქციამდე რამდენიმე დღით ადრე რუსთავის თვითმმართველობა აკეთებდა განცხადებებს, რომ აქციაზე მათი თანამშრომლები,  მხოლოდ სამუშაო დღის დასრულების - 18  საათის შემდეგ მივლენ. თუმცა დღეს აქციაზე ჩვენ მათი გადაღების საშუალება 15:45 საათიდან  გვქონდა..

აღნიშნული აქციის მიმართ საზოგადოებაში არა ერთგვაროვანი დამოკიდებულებაა.  საზოგადოების ერთი ნაწილი მიიჩევს, რომ მორალურად გაუმართლებელია ,, ნაციონალურმა მოძრაობამ" აქცია  იმ რუსთაველის მოედანზე გამართოს,  სადაც არა ერთგზის ფიზკურად გაუსწორდა აქციის მონაწილეებს. საზოგადობის ეს ნაწილი ,,ნაცონალურ მოძაობას" 26 მაისს  და 7 ნოემბერს ახსენებს და აცხადებს, რომ ყოფილი მმართველი  გუნდი, უკვე დიდი ხანია,  თავად დაშორდა ევროპულ ფასეულობებს.

p.s  ფოტორეპორტაჟი იხილეთ kkpress.ge-ს facebook-ის გვერდზე. 

 

 

ეკატერინე კუდარავა

მანონ ბოკუჩავა

kkpress.ge მასალის  გამოყენება  შეგიძლიათ,  მხოლოდ,  საიტის  მითითებით