36 ოჯახი სიცოცხლისთვის საშიშ გარემოში ცხოვრობს

KKPRESS.GE

რუსთავში,  ყაზბეგის #1  მცხოვრები 36 ოჯახი,  წლებია ადგილობრივი და  ცენტრალური ხელისუფლებისგან დახმარებას ელის. შენობა სასწრაფო სარეაბილიტაციო სამუშაოებს საჭიროებს,  თუმცა დღემდე უამრავი დაპირების მიუხედავად ადამიანებს ცხოვრება კვლავ საშიშ გარემოში უწევთ. 

აღნიშნულ შენობაში მცხოვრები მსახლეობა აცხადებს, რომ რეაბილიტაცია სახლს  ბოლოს  80-იან წლებში და ისიც უხარისხოდ ჩაუტარდა.  ამბობენ, რომ  ამის შემდეგ  მათი არსებობა ქალაქის ხელმძღვანელობას,  მხოლოდ არჩევნების პერიოდში ახსენდებოდა.  

„ ადგილობრივი თვითმმართველობის არჩევნების პერიოდში,  მამუკა ჩიქოვანი შეგვხვდა და დახმარებას დაგვპირდა, მაგრამ ხედავთ ეს დაპირება დაპირებადვე დარჩა. ხალხს ბინებიც კი გვაქირავებინა, რომ ვითომდა აქ სამუშაოები იწყებოდა. არჩევნებმა გაიარა და მას შემდეგ არავის გავხსენებივართ", -ამბობს ვიტალი მამაცაშვილი.

ყაზბეგის პირველის მაცხოვრებლები ამბობენ, რომ მათ წერილები ერთი წლის უკან საქართველოს პრეზიდენტის და მაშინდელი პრემიერ-მინისტრის სახელზე 4-ჯერ გააგზავნეს, თუმცა ყველა მათი მცდელობა უშედეგო აღმოჩნდა.  

„ პრეზიდენტისა და პრემიერის სახელზე წერილი თავისი ფოტოსურათებით 4- ჯერ გავაგზავნეთ, მაგრამ წერილზე პასუხი ყოველაჯერზე  ერთი და იგივე მივიღეთ. ამ ეტაპზე,  თანხა არ გვაქვს და მიმდინარეობს თანხების მოძიება-ო, გვწერდნენ პრეზიდენტისა და პრემიერის ადმინისტრაციიდან".

მოსახლეობა ამბობს, რომ არჩევნების შემდეგ,  მხარის გუბერნატორთან, დავით კირკიტაძესთან  შეხვედრის დროს,  მას ზემოთაღნიშნულ მისამართზე მისვლა სთხოვეს.

„ როგორც გავიგე ჩვენი თხოვნის შემდეგ კორპუსის სანახავად კირკიტაძე და ჩიქოვანი ერთად ყოფილან. ამის შემდეგ კირკიტაძემ გვითხრა, რომ თურმე ნანახმა მოლოდის გადააჭარბა და ამის შესახე მას ერთი წლის წინ,  რომ სცოდნოდა საცხოვრებელ პირობებს გააუმჯობესებდა, რაც  სრული სიცრუეა", - აცხადებს კორპუსის მამასახლისი.

მოსახლეობა ამბობს,  რომ სახლში შესულებს იმის გარანტია არ აქვთ, რომ იქიდან ცოცხლები გამოვლენ.  

„ დახმარების იმედი სულ გვაქვს,  მაგრამ ძნელია, როცა ქვეყანაში ორხელისუფლებიანობაა. ერთი მხარე მეორეს აბარებს პასუხისმგებლობას და პირიქით, მანამდე კი ჩვენ სახლში, რომ შევდივართ იმის გარანტია არ გვაქვს,  რომ უკან ცოცხლები გავალთ. დეკემბრის თვეში ხელმოწერები მოვაგროვეთ და ძიძიგურის ბიუროში მივიტანეთ. ადგილზე დავით მაღლაკელიძე მოვიდა და დაგვპირდა,  რომ ამ კორპუსის საკითხს საკრებულოს გადასცემდა ",-აცხადებს მოსახლეობა.    

მაჟორიტარის ბიუროს ხელმძღვანელი, დავით მაღლაკელიძე კი ამბობს, რომ ქალაქში ყაზბეგის ქუჩის მსგავსი ავარიული ძალიან ბევრი შენობაა, რომელიც სასწრაფოდ საჭიროებს გამაგრებით სამუშაოებს. ბიუროში აცხადებენ, რომ საკითხის მოსახლეობისთვის სასიკეთოდ გადასაწყვეტად ყველაფერს აკეთებენ.

 

 

ეკატერინე კუდარავა

kkpress.ge მასალის  გამოყენება  შეგიძლიათ,  მხოლოდ,  საიტის  მითითებით