,, აი, ამის გამო შეგვიწყვიტეს სოციალური დახმარება “

KKPRESS.GE

გარდაბნის რაიონის  საზღვრისპირა სოფელ ვახტანგისში,  აზიური ტიპის სამსართულიანი  ,, სასახლეების" გვერდით კრამიტაცლილი ერთსართლიანი სახლები დგას. სიმდირისა და სიღარიბის მკვეთრი კონტრასტის მიზეზების ძიებას არ ვცდილობთ, თუმცა ჩვენთან საკუთარ ცხოვრებაზე საუბრის  სურვილს  ვახტანგისის მოსახლეობის ნაკლებად შეძლებული ნაწილი გამოთქვამს.

ერთ-ერთი ასეთი  ოჯახი გულვერდაშვილებისაა.  გვიხსნიან, რომ ახლობლის ნაჩუქარი  ძროხის გამო ოჯახს სოციალური დახმარება შეუწყდა.  ,, ჩემ  მეუღლეს ასთმა აწუხებს და ხერხემლის მალების აქვს დაზიანებული. ექიმები გვიწერენ საბუთებს, მაგრამ ირკვევა, რომ ინვალიდობის სტატუსის მისანიჭებლად  ამაზე უარესი რამ უნდა გჭირდეს.  

ავადმყოფობას დაერთო ისიც, რომ 20 მარტს სოციალური მომსახურების გარდაბნის განყოფილებისგან წერილი მივიღეთ, გვწერენ რომ სოციალური დახმარება მოგვიხსნეს. ეს ყველაფერი კი აი, ამ ძროხის გამო მოხდა", - გვიხსნის, შალვა გულვედაშვილი და ბოსელთან მივყავართ. ,,დამნაშავე" ჩალისფერთმიანი ძროხა ადგილზე გვხდება. ,, მე არ მიყიდია ეს ძროხა. მთელმა სამეზობლომ იცის, რომ ის ჩემ რძალს ახლობელმა აჩუქა. ჩემი შვილი და რძალი ცალკე ცხოვრობენ, თუმცა რაღაც პერიოდით  აქ არიან გადმოსულები.

როდესაც მოვიდა აგენტი, ძროხას ხომ არ დავმალავდი? კი ვთხოვე  არ ჩამიწერო  ეს ძროხა, ამის გამო დახმარება არ მომიხსნან-მეთქი, მაგრამ მაინც ჩაუწერია. ასე გვითხრეს ოჯახში მარჩენალა ძროხა გაგჩენიათო.

მე და ჩემი მეუღლე არ ვართ საპენსიო ასაკის პენსია, რომ ავიღოთ. მე ასევე არ მაქვს სტაბილური სამსახური, რომ ჩემ ავადმყოფ მეუღლეს მივხედო.  ძალიან, ვთხოვ ახალ მთავრობას დამეხმაროს და ამ ერთი ძროხის გულისთვის არ დამტოვოს დახმარების გარეშე", - დასძენს, გულვერდაშვილი.

გვიხსნის, რომ ის და მისი დაოჯახებული შვილი ცალკე ოჯახებად ცხოვრობენ. მათთვის, ვინც მის დახმარების სურვილს გამოთქვამს გვთხოვს გადავცეთ, რომ სოციალური დახმარების პროგრამა მის მეუღლე,  ლეილა ოგანოვაზე იყო გაფორმებული და თუ დაინტერესდებიან შეუძლიათ  გაეცნონ მათ საქმეს.

,, გვითხრეს, რომ გადაწყვეტილების გასაჩივრება, მხოლოდ, სასმართლოში შეიძლება. არ ვიცით როგორ მოვიქცეთ..", - ამბობენ, ოჯახის სხვა წევრები. ვათვალიერებთ სახლს, სადაც სახურავის დაზიანების გამო ყველა ოთახის ჭერზე წყლოს  კვალია.  უდგათ შეშის ღუმელი და ძველი ტელევიზორი,  მაცივარი და  ელექტროღუმელი.

გულვერდაშვილების ოჯახის სოციალურ მდგომარეობაზე  მათი მეზობლებიც და ვახტანგისის ტერიტორიული ერთეულის რწმუნებული,  მარინე ირემაშვილიც საუბრობს. მათი თქმით, ოჯახი ღარიბია და ჰყავთ ოჯახის წევრი, რომელსაც მუდმივი სამედიცინო დახმარება სჭირდება. 

ვინტერესდებით არსებობს, თუ არა რაიმე სოციალური ხასიათის სახელმწიფო პროგრამა საზღვრისპირას სოფელებისთვის. ვახტანგისის რწმუნებული სოფელში ვერც ერთი  მსგავსი მიმართულების სახელმწიფო პროგრამას ვერ იხსენებს.

,, ჩვენი სოციალური ქულა თავიდან 41 000 იყო, ახლა გახდა 74 560, მე მაინტერესებს სამართლიანია, როდესაც ერთი და ისიც სხვისი ნაჩუქარი ძროხის გამო ქულები ასე იზრდება?", - გვეკითხება, შალვა გულვედაშვილი.

ამ კითხვაზე პასუხის მისაღებად სოციალური მომსახურების სააგრენტოს გარდაბნის სამსახურს ვსტუმრობთ.   გვიხსნიან, რომ ინფორმაციის გასაცემად  ნებართვა სჭირდებათ ,, ზევიდან" და დასძენენ, რომ აღნიშნულ პრობლემაზე თავად სოციალური დახმარება შეწყვეტილმა ოჯახმა უნდა მიმართოს.  

 

სოფიკო ზურაშვილი

მანონ ბოკუჩავა

kkpress.ge მასალის გამოყენება შეგიძლიათ, მხოლოდ, საიტის მითითებით