,, თანამდებობის დატოვების შესახებ განცხადება ზეწოლის შედეგად დავწერე“

KKPRESS.GE

მარნეულის წყალმომარაგების საკითხის მოსაგვარებლად მუნიციპალიტეტმა ორი წლის წინ  შპს მარნეულის სოფწყალი შექმნა. მის ხელმძღვანელად კი გერონტი სივსივაძე დანიშნა. აღნიშნული შპს-ს 100%-იანი წილის მფლობელი თავად მუნიციპალიტეტია.

ორწლიანი მუშაობის შემდეგ შპს-ს ახალი ხელმძღვანელი ჰყავს. უკვე, ყოფილი დირექტორის, გერონტი სივსივაძის განცხადებით მან თანამდებობა ზეწოლის შედეგად დატოვა.

,, თანამდებობის დატოვების შესახებ განცხადება ზეწოლის შედეგად დავწერე, არსებობს ამის დამადასტურებელი კონკრეტული დოკუმენტები. 2013 წლიდან 14 მოხსენებითი ბარათით მივმართე საკრებულოს და აქედან მხოლოდ, 6-ზე მივიღე პასუხი, დანარჩენ 8-ზე არც დადებითი და არც უარყოფითი პასუხი არ მიმიღია.

წყლის ტარიფის დამტკიცების შემდეგ, ფულის ასაკრებად წყლის შესაბამისი ხარისხით მიწოდება იყო საჭირო, არადა ჩვენ შესაბამისი აღჭურვილობა არ გვქონდა და პრაქტიკულად შიშველი ხელებით ვიყავით. საკრებულომ იმის ნაცვლად, რომ განეხილა ჩვენი საჭირობები, ამ თემის იგნორირება მოახდინა. მე ვარ ნამუშევარი ამ სისტემაში და კარგად ვიცი ასეთი დამოკიდებულებით რა ცუდი შედეგები დადგება და ამიტომ ვსაუბრობ ამ თემაზე", - ამბობს, შპს მარნეულის სოფწყალის ყოფილი დირექტორი, გერონტი სივსივაძე.

მის ბრალდებებს უსამართლოს უწოდებს მარნეულის საკრებულოს თავჯდომარე, ისპანდარ ქერიმოვი. აცხადებს, რომ სივსივაძემ თანამდებობა საკუთარი სურვილით დატოვა.

,, მე არ მინდოდა მისი გაშვება, რადგან ვთვლი რომ კარგი სეპეციალისტია, მაგრამ წასვლის შესახებ განცხადება თავად დაწერა. ბატონ გერონტის სურდა სოფწყლის ყველა პრობლემა ერთი ხელის მოსმით გადაგვეწყვიტა, ჩვენ კი ვაკეთებდით იმას რის საშუალებასაც ჩვენი ბიუჯეტი გვაძლევდა. ასე, რომ ზედმეტია საუბარი რაიმე ზეწოლაზე", - ამბობს, ქერიმოვი.

უპასუხო წერილების თემაზე კომენტარს, მარნეულის საკრებულოს ინფრასტრუქტურის და აგრალურ საკითხთა კომისიის ხელმძღვანელი, რომან ტაბატაძე აკეთებს. ტაბატაძის თქმით, სივსივაძის ყველა წერილზე აქვთ პასუხი გაცემული. აცხადებს, რომ მუნიციპალიტეტმა ვერ შეძლო შპს ყოფილი დირექტორის ტექნიკის კუთხით არსებული ყველა მოთხოვნის დაუყოვნებლივ შესრულება, რის გამოც უკმაყოფილო სივსივაძემ თანამდებობა დატოვა.

შპს მარნეულის სოფწყალს, უკვე ახალი დირექტორი ამნისტიის შედეგად პოლიტპატიმრის სტატუსით გათავისუფლებული, ბადრი ქველაძე ჰყავს.

მანონ ბოკუჩავა

kkpress.ge მასალის გამოყენება შეგიძლიათ, მხოლოდ, საიტის მითითებით