ურთიერთბრალდებები და დასაქმების მოლოდინში მყოფი რუსთაველები

KKPRESS.GE

მაშინ, როდესაც რუსთაველი უმუშევრები იმედით ელიან რუსთავი-თბილისის ჩქაროსნული ავტომაგისტრალის მშენებლობის დაწყებას, ინფრასტრუქტურის სამინისტრო ტენდერის გამოცხადებას არ ჩქარობს.

თუმცა სამინისტრო  ჩქარობს და დაუყოვნებლივ ითხოვს პროკურატურამ შეისწავლოს ქვემო ქართლის გუბერნატორის ხელმოწერილი რამდენიმე დოკუმენტი.  ნარმანიას უწყება, რუსთავი-თბილისის ავტომაგისტრალის მშენებლობაზე ქვემო ქართლის გუბერნატორის, დავით კირკიტაძის ინტერესებზე საუბრობს. სამინისტრო ფიქრობს, რომ კირკიტაძემ საეჭვო მოტივაციით მთავრობას თბილისი-რუსთავის მონაკვეთზე ე.წ. ბუფერული ზონის მოხსნის ინიციატივით მიმართა და იდეა განახორციელა კიდეც. ასევე, სამინისტრო ჟურანალისტებს აწვდის ინფორმაციას, რომ რუსთავი-თბილისის ავტომაგისტრალის ასაშენებელ ტერიტორიაზე, 8057 კვ.მ მიწის მონაკვეთი მოქალაქე ჯორჯ გვიმრაძეს გადეცა. შემდეგ კი აღნიშნულმა პირმა მიწა ორ თვეში  გურამ გვიმრაძეს აჩუქა.

,, ვინ არიან აღნიშნული პირები, აქვთ თუ არა კავშირი ყოფილი ხელისუფლების წარმომადგენლებთან ან ქვემო ქართლის გუბერნატორთან, რატომ მოხდა ასე სასწრაფოდ სახელმწიფო საკუთრებაში არსებული მიწის გასხვისება - ყოველივე ამას მოკვლევა დაადგენს", - აცხადებს ინფრასტრუქტურის სამინისტრო.

ნარმანიას უწყებას დავით კირკიტაძემ საგანგებო ბრიფინგით დღეს უპასუხა. რეგიონის გუბერნატორი ინფრასტრუქტურის სამინისტროს მაღალჩინოსნებს კაბინეტებიდან გამოსვლას და საკითხის რეალურ შესწავლას ურჩევს.

,, სამინისტრო თავისი უუნარობის გამართლებას და იმ ფაქტს, რომ ექვსი  თვის განმავლობაში ავტომაგსიტრალის ასაშებებლად ტენდერი ვერ გამოაცხსადა -  ცდილობს ვინმეს გადააბრალოს.

მოქალაქე გვიმრაძის მიწა, რომელზეც ააგო მთელი განცხადება სამინისტრომ, საერთოდ არ არის შეხებაში იმ ადგილთან, სადაც აღნიშნულმა ახალმა  გზამ უნდა გაიაროს. ჩვენ ახლა ვიმყოფებით, სწორედ გვიმრაძის მიწაზე და ამ მონაკვეთს 90 მეტრი აშორებს იმ ადგილთან, სადაც ავტომაგისტრალმა უნდა გაიაროს.

აქვე ვიტყვი, რომ სამინისტრო ცრუოებს, როდესაც ამბობს რომ ჩვენ ეს მიწა გვიმრაძეს ვაჩუქეთ, აქ რეალურად მოხდა გაცვლა მიწის სხვა მონაკვეთში, სადაც სპორტის სასახლე უნდა აგვეშენებინა", - აცხადებს კირკიტაძე. ამბობს, რომ მთავრობას ბუფერული ზონის მოხსნის ინიციატივით მიმართა და ის, რომ ეს სწორი გადაწყვეტილება იყო კონკრეტული ფაქტებით შეუძლია დაადასტუროს. ,, ამ გადაწყვეტილების გამო რუსთავში თითქმის დასრულებულია ცხრასართულიანი სასტუმროს მშენებლობა, ჰიუნდაის ცენტრის და ახალი ავტოცენტრი. ეს კი კონკრეტული სამუშაო ადგილებია, რაც ძალიან სჭირდება ქალაქს", - აცხადებდა, კირკიტაძე.

კირკიტაძემ  ჟურნალისტებს იმ ადგილების დათვალიერება შესთავაზა, სადაც მისი განცხადებით რუსთავი-თბილისის გზის მშენებლობა 8 სექტემბერს დაიწო და ერთ თვეში შეჩერდა. საუბრობდა, რომ ნახევარ-კილომეტრიან მონაკვეთზე სამუშაოები დაწყებული იყო და ტერიტორიიდან მიწის ნაწილის ამოღებაც მოხდა. პერიოდულად სიცხისგან შეწუხებული გუბერნატორი კი პრემიერის მრჩეველს მიმართავდა: ,, ო, დიდო ხუხაშვილო მოგვიღრუბლე ცა".

 

მსგავს თემაზე: რუსთავი-თბილისის ავტობანი - უმუშევარი რუსთაველების იმედი

http://kkpress.ge/index.php?do=fullmod/news&id=850

მანონ ბოკუჩავა

kkpress.ge მასალის გამოყენება შეგიძლიათ, მხოლოდ, საიტის მითითებით