ეკონომიკის სამინისტრომ წინასაარჩევნოდ პრივატიზირებული ბინის გაყიდვის და განკარგვის ნებართვა გასცა

kkpress.ge

წინასაარჩევნოდ საცხოვრებელი ფართების პრივატიზაცია აქტიურად მიმდინარეობდა. რუსთავში, ნიკო ნიკოლაძის №7-ში მცხოვრები ოჯახები იხსენებენ, რომ მათ საცხოვრებელი ფართის პრივატიზების ორდერი, არჩევნების წინა დღეს გადასცეს.

მოგვიანებით კი როდესაც  ამ ოჯახებმა გადაწყვიტეს პრივატიზირებული ბინების გაყიდვა, ან იპოთეკით  დატვირთვა, მათ აუხსნეს, რომ აღნიშნული ქონების გაყიდვის და განკარგვის უფლება ეკონომიკის სამინისტროს ნებართვის გარეშე არ ჰქონდათ.

,, ბაზარში ვვაჭრობ და საქონელის შესაძენად თანხა დამჭირდა. მივმართე ბანკს და სესხი ვითხოვე. ერთადერთი რა ქონებაც მაქვს ეს ბინაა და ამ ბინის საკუთრების ორდერით ვითხოვდი სესხს. ბანკის თანამშრომელმა კი მითხრა, რომ არ მაქვს ამ ბინის გაყიდვის, ან სხვა სახით გამოყენების უფლება. ვეღარ გავიგეთ, მაშინ რანაირი მესაკუთრე ვარ?!  ახალ ხელისუფლებას ვთხოვთ დაგვეხმაროს",  - საუბრობს, ნიკოლაძის №7-ში მცხოვრები, ეთერ ყაჭიაშვილი.

ყაჭიაშვილმა ეკონომიკის სამინისტროს  დაქვემდებარებულ საჯარო სამართლის იურიდიულ პირ ,, სახელმწიფო ქონების ეროვნული სააგენტო"-ს მიმართა და წინასაარჩევნოდ პრივატიზირებული ბინის განკარგვის უფლება ითხოვა.

kkpress.ge-ს ინფორმაციით ეთერ ყაჭიაშვილის განცხადება გუშინ დაკმაყოფილდა და მას ეკონომიკის სამინისტრომ ბინის გაყიდვის და განკარგვის უფლება მისცა.

ყაჭიაშვილის გარდა, ჩვენი ინფორმაციით, მსგავსი  პრობლემის წინაშე რუსთავში მცხოვრები ათზე მეტი ოჯახი დგას.

kkpress.ge მასალის გამოყენება შეგიძლიათ, მხოლოდ, საიტის მითითებით        

გ.მ  - ჰა, სულ ცუდზე ვწერ?! ხანდახან ასეთებსაც დავწერ, ოღონდ კვარტალში ერთხელ ))