დასაქმების პროგრამა მაღალჩინოსნებს, სულ ცოტა, უმუშევრად დატოვებას უქადის

KKPRESS.GE

დასაქმების პროგრამასთან დაკავშირებით საჯარო მოხელეთა დაკითხვა გრძელდება. ამჯერად ქვემო ქართლის საოლქო პროკურატურაში, რეგიონის გუბერნატორი დავით კირკიტაძე დაკითხეს.

პროკურატურასთან, კირკიტაძეს ადგილობრივ მედიასთან ერთად ცენტრალური ტელევიზიების ჟურნალისტები  დახვდნენ. ,,არის თუ არა ეს ზეწოლა დაკითხვიდან გამოსვლის შემდეგ გეტყვით", - პასუხობდა კირკიტაძე მედიას.

4 საათიანი დაკითხვის შემდეგ კი გუბერნატორმა განაცხადა, რომ მისი ერთადერთი მიზანი აღნიშნული პროგრამის ფარგლებში მოქალაქეების დასაქმება იყო.

 ,, პროგრამის ფარგლებში პირველ ეტაპზე უნდა შექმნილიყო ბაზა, მომხდარიყო ამ ბაზაში გაერთიანებული ადამიანების გადამზადება. ხოლო  მომავალში მათთვის უნდა შეგვექმნა სამუშაო ადგილები", - საუბრობდა გუბერნატორი.

შეგახსენებთ, რომ დასაქმების პროგრამის იდეა ვანო მერაბიშვილს ეკუთვნის. წინასაარჩევნოდ დასაქმების სამინისტროს და სპეციალური პროგრამის შექმნის ინიციატივით სწორედ, მერაბიშვილი გამოდიოდა. ამ პროგრამაში ასობით მოქალაქე იყო ჩართული. პროკურატურა საჯარო მოხელეებთან ერთად მათითაც ინტერესდება. 

მიმდინარეობს პროგრამაში ჩართულლი რიგითი მოქალაქეების დაკითხვებიც. 

არსებობს ეჭვი, რომ სახელმწიფო ბიუჯეტიდან დაფინანსებულ პროგრამას ,,ნაციონალური მოძრაობა"  არჩევნებისთვის იყენებდა. კონკრეტულად კი საგამოძიებო უწყებები არკვევენ იყვნენ,  თუ არა ,,ნაციონალური მოძრაობის"   აგიტაციით დაკავებული აღნიშნულ პროგრამით  დასაქმებული მოქალაქეები.

KKPRESS.GE  მასალის გამოყენება შეგიძლიათ, მხოლოდ, საიტის მითითებით