მარნეულში ხვნა–თესვის ბარათებს სამინისტროს უბრუნებენ

KKPRESS.GE

,, კასუმლოში გავეცი  467  ბარათი და აქედან,  ხალხმა 269 უკან დააბრუნა, რადგან მიწა უკვე დამუშავებული აქვთ ", - სოფლის რწმუნებული, შუქურ მამედოვი.

მარნეულის  გამგეობაში დღეს ტრადიციული თათბირი გაიმართა. გამგებელს მიმდინარე და დაგეგმილი სამუშაოების  შესახებ ანგარიში სამსახურების ხელმძღვანელებმა  და სოფლის რწმუნებულებმა ჩააბარეს.

სოფლის რწმუნებულთა უმეტესობა უკმაყოფილებას გამოთქვამდა სასოფლო-სამეურნეო ბარათებთან დაკავშირებით. აცხადებდნენ, რომ  სოფლის მეურნეობის სამინისტროდან  სასოფლო-სამეურნეო ხვნა-თესვის ბარათების გამოგზავნა გვიანდება. აღნიშნავდნენ, რომ ბარათები არ ჩამოვიდა იმ სასოფლო სამეურნეო მიწების  მესაკუთრეებზეც,  რომლებიც სამინისტროსთვის გაგზავნილ პირველ სიებში იყვნენ.

,, არსებობს გარკვეული პრობლემები,  ბარათები არ ჩამოვიდა ნაწილი მოქალაქეებისთვის, რომლებიც გაგზავნილ სიებში იყვნენ.  ამ საკითხს დღეს გავარკვევთ სოფლის მეურნეობის სამინისტროსთან", - აცხადებდა, მარნეულის მუნიციპალიტეტის ეკონომიკური განვითარებისა და მუნიციპალური ქონების მართვის სამსახურის უფროსი, დავით ხარშილაძე.

თათბირზე ბარათებთან  დაკავშირებით სოფელ კასუმლოში არსებულ სიტუაციაზე კი რწმუნებული, შუქურ მამედოვი საუბრობდა. ,, კასუმლოში გავეცი 467  ბარათი და აქედან,  ხალხმა 269 უკან დააბრუნა, რადგან მიწა უკვე დამუშავებული აქვთ ", - აცხადებდა სოფლის რწმუნებული. 

მარნეულის გამგებელმა, პაატა აბრამიშვილმა თითოული სოფლის რწმუნებულს სიების, კიდევ ერთხელ, დაზუსტება მოსთხოვა. ასევე, განაცხადა, რომ ინდივიდუალურად მოხდება იმ მიწის მესაკუთრეთა საკითხის  შესწავლა, რომელთაც გაურკვეველი მიზეზების გამო ხვნა-თესვის ბარათი არ ჩამოუვიდათ.

მანონ ბოკუჩავა

kkpress.ge მასალის  გამოყენება  შეგიძლიათ,  მხოლოდ,  საიტის  მითითებით