კულტურისა და დასვენების პარკის სარეაბილიტაციო სამუშაოები განახლდა

KKPRESS.GE

რუსთავის ტყე-პარკში სარეაბილიტაციო სამუშაოები ერთი კვირის წინ  განახლდა. ამ ეტაპზე პარკის შესასვლელის რეკონსტრუქცია მიმდინარეობს და როგორც სამუშაოების მწარმოებელი აცხადებს, უახლოეს პერიოდში პროექტით გათვალისწინებული სხვა სამუშაოებიც დაიწყება.

რუსთავის კულტურისა და დასვენების პარკის რეაბილიტაციის პროექტი გასული წლის მაისში დაიწყო. პროექტის ღირებულება 3 მლნ ლარია, რომლის ნაწილი პრეზიდენტის სარეზერვო ფონდიდან დაფინანსდა.  პარკის რეაბილიტაციის ბოლომდე დასასრულებლად  საჭირო თანხები ქალაქის თვითმმართველობის განცხადებით, ცენტრალური ბიუჯეტიდან უნდა დაფინანსებულიყო. ბოლო თვეების განმავლობაში  პარკის სარეაბილიტაციო სამუშაოები კი სწორედ იმიტომ შეჩერდა, რომ აღნიშნული ტრანსფერი ჩარიცხული  არ იყო.

მიმდინარე თვეში ქალაქის თვითმმართველობას ცენტრალური ბიუჯეტიდან პარკის რეაბილიტაციისთის, უკვე გადმოერიცხა 1 მლნ, 460 ათ ლარი და შესაბამისად, განახლდა  სამუშაოებიც.

როგორც ქვემო ქართლის საინფორმაციო პორტალთან საუბარისას სამუშაოების მწარმოებელმა,  უჩა ლათიბაშვილმა განაცხადა, პროექტის პირველ ეტაპზე მოეწყო ფეხით სავალი ბილიკები, დამონტაჟდა სანათი წერტილები, ასევე წყალსადენის და კანალიწაციის სისტემები.  გაიწმინდა ტბა. მეორე ეტაპის ფარგლებშ კი  იგეგმება პარკში არსებული ღია კინოთეატრის რეაბილიტაცია, გრანიტ-ფოლადის, ასევე  ხის სკამებისა და საპიკნიკე კომპლექტების მონტაჟი. იგეგმება შადრევნების მოწყობა, პარკში არსებული ხიდისა და სხვა ინფრასტრუქტურის რეაბილიტაცია.

,, გასული წლის ნოემბრიდან სარეაბილიტაციო სამუშაოები შეჩერებული იყო, ვინაიდან შესაბამისი თანხები არ იყო გადმორიცხული. ერთი კვირაა  უკვე  განვაახლეთ  სამუშაოები. ამ ეტაპზე პარკში შესასვლელი თაღის რეაბილიტაცია მინდინარეობს. პროექტით გათვალისწინებულ დანარჩენ სამუშაოებსაც პარალელურად განვაახლებთ",- განაცხადა ლათიბაშვილმა.

პარკის გამწვანების პროცესზე ისაუბრა რუსთავის  მერმა,  ლაშა მინდელმა.  მისი თქმით, მიმდინარე წელს ტყე-პარკში ათასამდე სხვადასხვა ჯიშის ხის დანერგვა იგეგმება.

„ პარკის სარეაბილიტაციო სამუშაოები უკვე განახლდა, რისთვისაც ცენტრალურ ხელისუფლებას მადლობა მინდა ვუთხრა. მნიშველოვანია ტყე-პარკის გამწვანების საკითხიც.  მიმინარე წელს, ჩვენი ამერიკელი მეგობრების დახმარებით, ვაპირებთ დავრგოთ 1000 ნერგი. ჩვენ  ეკოლოგიური გარემოს აღდგენისა და გამწვანების პროცესს სწორედ პარკიდან დავიწყებთ და მთელ ქალაქს მოვიცავთ",- განაცხადა ქალაქის მერმა და დასძინა, რომ ტყე-პარკის რეაბილიტაცია სავარაუდოდ,  შემოდგომისთვის დასრულება.

შეგახსენებთ, რომ რუსთავის კულტურისა და დასვენების პარკი 30 ჰექტარზეა გაშენებული. პარკის რეაბილიტაციის პროექტი ესპანელი არქიტექტორების მიერ შემუშავდა. სარეაბილიტაციო სამუშაოებს კი კომპანია ,,ალგეთი" აწარმოებს.

 

სოფიკო ზურაშვილი

kkpress.ge მასალის გამოყენება შეგიძლიათ, მხოლოდ, საიტის მითითებით