ქვემო ქართლის ადგილობრივი ხელისუფლებებისთვის აქტუალური პრობლემები

KKPRESS.GE

დღეს, ქვემო ქართლის გუბერნიაში რეგიონის გამგებლებისა და დავით ნარმანიას შეხვედრისას, ყველა მუნიციპალიტეტისთვის ერთნაირად პრობლემური საკითხების გარდა, საუბარი შეეხო კონკრეტული თვითმმართველობისთვის პრობლემურ თემებსაც.  

შეხვედრაზე, საქართველოს მყარი ნარჩენების კომპანიის დირექტორის, გიორგი შუხოშვილის განცხადებას რუსთავის ნაგავსაყრელთან დაკავშირებით, რუსთავის საკრებულოს თავმჯდომარის უკმაყოფილება მოჰყვა. შუხოშვილი აცხადებდა, რომ რუსთავის ნაგავსაყრელი ორგანული კანონის მოთხოვნების თანახმად 2012 წლიდან სამართავად მათ უნდა გადასცემოდათ. რაზეც გურგენიძე პასუხობდა, რომ მისთვის გაუგებარია ცენტრალური ხელისუფლების დეცენტრალიზაციის  ხედვა. მაშინ, როდესაც ერთის მხრივ მაქსიმალურ დეცენტრალიზაციაზეა საუბარი, მეორეს მხრივ კი თვითმმართველობას ნაგავსაყრელის სახით ქონებას ართმევენ.  

გურგენიძის დამოკიდებულებას საკითხის მიმართ  კანონსაწინააღმდეგოდ მიიჩნევს გიორგი შუხოშვილი და აცხადებს, რომ ამგვარი გადაწვეტილებით ცენტრალური მთავრობა თვითმმართველობას ,,ზედმეტი ტვირთისგან ანთავისუფლებს" და აძლევს საშუალებს მეტად იზრუნოს ქალაქის დასუფთავებაზე.

შუხოშვილის და გურგენიძის კამათში პერიოდულად გარდაბნის გამგებელი, ნუგზარ ჩადუნელი  ერთვებოდა და აცხადებდა, რომ აღნიშნული ნაგავსაყრელი, რომელიც გარდაბნის ტერიტორიაზე მდებარეობს - გარემოს აბინძურებს.

ნაგავსაყრელების თემა ყველაზე ნაკლებად აწუხებდა შეხვედრაზე მოსულ დმანისის გამგებელ, გოგა ბარბაქაძეს. მისი განცახდებით დმანისის მოსახლეობა წყლის ტარიფითაა უკმაყოფილო. ,,ჩვენთან სასმელი წყალი თვითდინებით მოდის, არც განსაკუთრებული გაფილტვრა სჭირდება მას და არანაირი ხარჯი არ მოაქვს კომპანიისთვის.

მიუხედავად ამისა სულზე 25 თეთრია გადასახდელი. პრობლემას ემატება ისიც, რომ ზამთარში მკაცრი კლიმატის გამო, თუ გადაკეტავ ონკანს წყალი იყინება, თუ არ გადაკეტავ გამოდის მწყობრიდან. რაც ამ თანამდებობაზე დავინიშნე ვითხოვ ამ საკითხის მოგვარებას", - საუბრობდა kkpress.ge-სთან ბარბაქაძე.

სხვა სირთულეების წინაშე დგას თეთრიწყაროს გამგეობა. შეხვედრაზე გამგებელმა რაიონში სხვადასხვა სამუშაობის მწარმოებელ არაკეთილსინდისიერ კომპანიებზე ისაუბრა, თუმცა რჩევა ცენტრალური მთავრობისგან ერთი კონკრეტილი საკითხის გარშემო ითხოვა. გამგებელი აცხადებდა, რომ თვითმმართველობას უწევს შეინახოს/შეუძინოს საწვავი კოდაში მდებარე საგანგებო სიტუაციების მართვის სამსახურს. ეს მაშინ, როდესაც თვითმმართელობას მსგავსი სამსახურის შენახვა არ ევალება. თემაზე თეთრიწყაროს გამგებელმა, მამუკა ჩოქურმა კონკრეტული რჩევა ვერავისგან მოისმინა.

საკუთარი რაიონის პრობლემებთან ერთად - საზღვრისპირა სოფლების მიმართ მეტი ყურადღების გამოჩენის საჭიროებაზე ისაუბრა, მარნეულის გამგებელმა, მერაბ თოფჩიშვილმა.

,, სოფლის განვითარების პროგრამაში თანხების ოდენობა დამოკიდებულია სოფელში მაცხოვრებელთა რაოდენობაზე. საზღვრისპირა სოფლებში რთული მდგომარეობაა - დაიცალა სოფლები მოსახლეობისგან და ცხადია, ამ პროგრამით ასეთი სოფლები ვერ განვითარდება.  იქნებ გამოვიჩინთ განსაკუთრებული დამოკიდბულება ასეთი საკითხების მიმართ", - საუბრობდა მარნეულის გამგებელი.

ნარმანიას უწყებიდან გამგებელს პასუხობდნენ, რომ ამ თემაზე საკონონმდებლო დონეზეა საუბარი, თუმცა საკითხს ჯერაც ,,ვერ დაადგა საშველი".

,, ჩვენი რაიონის საზღვრისპირა სოფლებში: წერაქვი, ოფრეთი, ახკერპი და ულიანოვკა -რთული მდგომარეობაა ინფრასტრუქტურის კუთხით. სამწუხაროდ, სოფლის პროექტების თანხები ამ სოფლებისთვის მცირეა, თუმცა ჩვენ თანადაფინანსების პრინციპით გავაკეთებთ რაც შეგვიძლია", - საუბრობდა თოფჩიშვილი.

მანონ ბოკუჩავა

kkpress.ge მასალის გამოყენება შეგიძლიათ, მხოლოდ, საიტის მითითებით