გარდაბნის თვითმმართველობა და შპს ,,შა-გი 2010“

23  დღეა ,,ქვემო ქართლის საინფორმაციო პორტალი" გარდაბნის თვითმმართველობისგან საჯარო ინფორმაციას ელის. ჩვენი ინტერესის საგანს წარმოადგენს გარდაბნის თვითმმართველობის და შპს ,,შა-გი 2010"-ის თანამშრომლობა. აღნიშნული კომპანია არის გარდაბანში განხორციელებული და მიმდინარე პროექტების ერთ-ერთი ყველაზე აქტიური დამპროექტებელი შპს.

7 თებერვალს გარდაბნის თვითმმართველობაში შესული წერილით, ვითხოვდით ინფორმაციას ,,შა-გი 2010"-თან დადებული ხელშეკრულებების შესახებ.საპასუხო წერილი ამ დრომდე არ მიგვიღია, რითიც თვითმმართველობამ საჯარო ინფორმაციის გაცემის ყოველგვარ ვადებს გადააცილა.

ჩვენი თემით დაინტერესება არაოფიციალურმა ინფორმაციამ გამოიწვია, რომლის თანახმადაც  შა-გის მიმართ თვითმმართველობის დამოკიდებულება კანონსაწინააღმდეგო გახდა და შპს-ს სხვა დამპროექტებლებთან შედარებით - უპირატესობა უკანონოდ ენიჭება. საუბარი იყო რაიონის ამჟამინდელი გამგებლის, ნუგზარ ჩადუნელის, ასევე სხვა უწყებებში მომუშავე მაღალჩინოსნების  და შა-გი 2010  ,,მეგობრულ  ურთიერთობებზე" და იმაზეც, რომ სწორედ ეს ურთიერთობები გახდა მიზეზი შა-გის დირექტორის გიორგი სებისკვერაძის ვაჟის, ნიკოლოზ სებისკვერაძის მუნიციპალიტეტის საფინანსო სამსახურში დასაქმების.

საჯარო რესსტრის ამონაწერის თანახმად ,,შა-გი 2010"-ის დირექტორი ნამდვილად გიორგი სებისკვერაძე აღმოჩნდა. გაირკვა, რომ ის ამავე დროს არის შა-გის 50%-იანი წილის მფლობელიც. მისი ვაჟი კი, უკვე რამდენიმე თვეა გარდაბნის საფინანსო სამსახურის მთავარი სპეციალისტის მოვალეობის შემსრულებელია.

საფინანსო სამსახურში შვილის, ხოლო ადგილობრივი და ცენტრალური ბიუჯეტების თანხით პროექტების დამპროექტებელ შპს-ში მამის  მუშაობაზე - კომენტარს გარდაბნის თვითმმართველობა არ აკეთებს. აცხადებენ, რომ გამგებელი ნუგზარ ჩადუნელი არ იმყოფება გამგეობაში და არ იციან, როდის მოვა.

,,ქვემო ქართლის საინფორმაციო პორტალი"-სთვის მნიშველოვანია გარდაბნის თვითმმართველობასა და შპს ,,შა-გი 2010" შორის დადებული ხელშეკრულებების გაცნობა, რათა  შევძლოთ გარკვევა, გარდა ინტერესთა კონფლიქტისა, რამდენად ხარისხიანად და საბაზრო ფასებში უწევს მომსახურებას აღნიშნული შპს მუნიციპალიტეტს.

მანონ ბოკუჩავა

kkpress.ge მასალის გამოყენება შეგიძლიათ, მხოლოდ, საიტის მითითებით