რუსთავის მერი აქციის მონაწილეთა ბრალდებებს პასუხობს

დღეს რუსთავის მაჟორიტარის ბიუროს წინ შეკრებილმა აქციის მონაწილეებმა განაცხადეს, რომ მგზავრთა გადაყვანაზე კონკურსის საკითხს ქალაქში ზვიად ძიძიგური წყვეტს. აცხადებდნენ, რომ რუსთავის მერმა, დავით ჯიქიამ მათ წარმომადგენლებთან შეხვედრისას განაცხადა, რომ ამ საკითხს ,,ზევიდან" წყვეტენ, კონკრეტულად კი ზვიად ძიძიგური წყვეტს.

აქციის მონაწილეთა განცხადებას რუსთავის მერი პასუხობს. ამბობს, რომ სამწუხაროდ მასთან მოლაპარაკებებიდან გამოსული აქციის მონაწილეთა წარმომადგენლები, არასწორ ინფორმაციებს ავრცელებენ.

,, საუბარი იმაზე, რომ საკითხს ქალაქი მერი ვერ წყვეტს და მაჟორიტარი ერევა თვითმმართველობის საქმეებში აფსურდია. სამწუხაროდ, ჩვენთან შეხვედრიდან გამოსული ადამიანები ჩადიან და არასწორ ინფორმაციებს ავრცელებენ", - საუბრობს ჯიქია.

მისი თქმით, საკონკურსო პირობების დამტკიცების შემდეგ, მერია სამართლებრივად ვალდებული იყო გამოეცხადებინა კონკურსი რუსთავი-თბილისის მარშუტზე, რადგან შიდა საქალაქო მიმართულებისგან განსხვავებით,  ამ შემთხვევაში მგზავრთა ნაკადი დათვლილი იყო და არ არსებობდა მიზეზი კონკურსის გადავადების.

,, კონკურსის გამოუცხადებლობის შემთხვევაში, რომ შემოსულიყო თვითმმართელობაში შესაბამისი უწყება და ეთქვა, რატომ არ გამოცხადდა კონკურსი, როდესაც ყველა წინა მოსამზადებული სამუშაო შესრულებულია?! ამას არა მხოლოდ მე, რაზეც ნაკლებად ვღელავ, არამედ ჩემი ათამდე თანამშრომელი გადაყვებოდა.  

ასევე გასათვალისწინებელია გაფიცვის გარემოებაც, აღნიშნულმა გაფიცვამ, რომლის შესახებაც თვითმმართველობა წინასწარ ინფორმირებული არ იყო, სამართებრივად აჩვენა, რომ არსებული გადამზიდავები არ არიან საიმედოები", - დასძენს რუსთავის მერი, დავით ჯიქია.

kkpress.ge მასალის გამოყენება შეგიძლიათ, მხოლოდ, საიტის მითითებით